АШУҮИС нь барилга байгууламж материаллаг нөөцийн хувьд сургалт, эрдэм шинжилгээний үйл ажиллагааг хэвийн явуулах, суралцаж буй оюутан, резидент, магистрант, докторант, мэргэжил дээшлүүлж буй мэргэжилтний бие дааж суралцах, эрдэмтэн багш нарын сургалтын үйл ажиллагааг ая тухтай нөхцөлд явуулах, мэдлэг боловсролоо дээшлүүлэх нөхцөл бололцоог бүрдүүлэн ажиллаж байна. 

Хичээлийн нийт өрөөний 70% нь нэг оюутанд ногдох талбайн нормыг хангасан ба хичээлийн нийт өрөөнүүд сургалтын байранд тавигдах эрүүл ахуйн бусад үзүүлэлтийг (гэрэлтүүлэг, чийглэг, температур) бүрэн хангасан байдаг. Мэргэшүүлэх хичээлийн суудлын тоо 15-22, нэг оюутанд ногдох талбай 2-2.2м2 байсан. 

Хичээлийн өрөө нь  15-37 суудалтай. Нэг оюутанд ногдох 1-2.85м2 ба мэргэшүүлэх чиглэлээр бага бүлгээр хичээллэх оюутны тоо 15-аас ихгүй байдаг. Компьютер дээр суурилсан дадлагын хичээл явуулахад оюутан компьютер дээр ажиллах боломж нөхцлөөр хангагдсан бөгөөд нэг ангид 20-оос ихгүй оюутан, суудлын тоо нь 22 байгаа нь БСШУЯ-ны сайдын 2014 оны 74 тоот тушаалын хавсралтын заалтыг бүрэн хангасан бол 2012, 2013 онд мэргэшүүлэх хичээлийн дадлага явуулах лабораторийн тоног төхөөрөмжийг шинэчлэх, өрөө тасалгааг тохижуулах ажлуудыг хийж гүйцэтгэсэн байна.   

Одоо АШҮУИС нь 3200  суудал бүхий хичээлийн 3 байр, 1200 оюутан амьдрах хүчин чадалтай оюутны 3 байр, амралтын цогцолбор 2 зэрэг үндсэн барилга байгууламжтайгаар үйл ажиллагаа явуулж байна. Нийт хичээлийн байруудын барилгын ашигтай талбай 24942 м2, сургуулийн түшиц эмнэлэг, клиник дээр байгаа хичээлийн өрөөнүүдийн талбай 3240м2, бүгд 28182м2 байгаа  бөгөөд 1 суралцагчид 3,2м2 талбай ноогдож байгаа нь “Олон нийт, иргэний барилга БНбД 31-03-03” дүрмийн 2.7 дахь заалтыг хангаж байна.

Мөн оюутны http://elearning.mnums.edu.mn/ цахим системд ерөнхий суурь хичээл, мэргэжлийн болон мэргэшүүлэх хичээлийн лекцүүд дижитал аудио болон видео дүрс хэлбэрээр хүргэдэг. 

Нийгмийн  эрүүл мэндийн  сургуулийн оюутнууд суурь дамжааны эхний 1, 2 дахь жилдээ ерөнхий суурь хичээлийг АШУҮИС-ийн Био-Анагаахын сургуулийг түшиглэн суралцдаг. Энэ сургалтын хүрээнд бичил амь дархлаа судлал, эрүүл зүйн микробиологи, гистологи, анатоми, биохими зэрэг хичээлийг тухайн хичээлийн лаборатори, сургалтын кабинетуудад судлан мэдлэг, ур чадвар эзэмшдэг. Дотрын өвчин судлал, Халдварт өвчин судлал, Яаралтай тусламж хичээлийн дадлага сургалт явуулахад АШУҮИС-ийн харьяа эмнэлгүүд болон эмнэлзүйн ур чадварын төвийг түшиглэдэг. Мэргэжлийн суурь болон мэргэшүүлэх хичээлүүдийг  сургалтын хүрээнд НЭМС-ийн 14 хичээлийн танхим,  компьютерийн 2 лаборатори болон  Хөдөлмөр, Орчны эрүүл ахуйн лаборатори, Шим тэжээл судлал, хоол үйлдвэрлэлийн лаборатори болон гэрээт байгууллагуудыг түшиглэн суралцдаг. Хөтөлбөрийн дадлага хичээл явагддаг лаборатори, танхимууд нь эрүүл ахуй, аюулгүй байдлыг хангах агааржуулалт, хорт бодисоос хамгаалах татах шүүгээ, тусгаарлах хаалт зэрэг зориулалтын хамгаалах арга хэмжээг хэрэгжүүлдэг.  Компьютерийн лаборатори нь лиценз бүхий SPSS21, STATA12 статистик программаар хангагдсан. Мөн Нийгмийн эрүүл мэндийн хүрээлэнгийн дараах лаборотори, төвүүд нь сургалтын томоохон бааз болдог.